ຂປລ.ຕາມ​ຂ່າວ​ ຈາກ​ນີວຢອກ, ທ່ານ ​ໂດ​

ຂປລ.ຕາມ​ຂ່າວ​ ຈາກ​ນີວຢອກ, ທ່ານ ​ໂດ​ນັນ ທຣຳ, ປະທານາທິບໍດີ ສ.ອາ​ເມ​ລິ​ກາ ປະກາດ​ແນວທາງ ​ປະຕິບັດ 3 ຂັ້ນຕອນ ​ເພື່ອ​​ເປັນ​ການ​ເປີດ ລະບົບ ​ເສດຖະກິດ ​ຂອງ ສ. ອາ​ເມ​ລິ​ກາ ​ອີກ​ຄັ້ງ ຢ່າງ​ເຕັມ​ຮູບ​ແບບ ຈາກ ​ວິ​ກິດ ​ການ​ແຜ່ລະບາດ​ ພະຍາດ ໂຄ​ວິດ-19 ​ເລີ່​ມຈາກ ​ຂັ້ນທຳ​ອິດ ທີ່​ຍັງ​ເປັນ​ການ​ຮັກສາ​ ຄວາມ​ເຂັ້ມງວດ ​ຂອງ​ ການ​ລວມກຸ່ມ ນອກ​ເຄຫາ​ສະຖານ ທີ່​ຫ້າ​ມ​ເກີນ 10 ຄົນ ​ແລະ ຮຽກຮ້ອງ​​ໃຫ້ປະຊາຊົນ ຢຸດ​ອອກ​ນອກ​ ເຄຫາ​ສະຖານ ຫາກ​ບໍ່​ຈຳ​ເປັນ. ສ່ວນ​ໂຮງຮຽນ ຄວນ​ປິດ​ສະຖານ​ທີ່​ ຕໍ່​ໄປ​ກ່ອນ. ແຕ່​ກຸ່ມ​ລັດ​ ທາງ​ຕາ​ເວັນ​ອອກ​ ສ່ຽງ​ເໜືອ ​ໂດຍ​ສະ​ເພາະ ລັດ​ນີວຢອກ ຍັງ​ສືບ​ຕໍ່​ ປິດ​ເມືອງ​ ​ແລະ ​ອີກ 6 ລັດ ​ໃກ້​ຄຽງ​ ປະກາດ​ ຂະຫຍາຍ ​ເວລາ​ ບັງຄັບ​ໃຊ້ ​ສະຖານະ​ການ​ ສຸກ​ເສີນ ​ໄປ​ຈົນ​ເຖິງ​ ກາງເດືອນ ພຶດສະພາ​ນີ້ ລວມມີ ນີວ​ເຈີ​ຊີ, ຄອນ​ເນ​ດທີ​ຄັດ, ​ເດ​ລາ​ເວຣ, ​ແມດ​ຊາ​ຊູ​ເຊັດ, ​ເພນ​ຊີ​ລ​ເວ​ເນຍ ​ແລະ ​ໂຣດ​ໄອ​ແລນ. ຂະນະ​ທີ່ ຜູ້​ວ່າການ​ລັດ ​ນີວຢອກ ຖະ​ແຫລ​ງ ກ່ຽວ​ກັບ ​ຕົວ​ເລກ ສະຖິຕິ ​ປະຈຳ​ວັນ ຂອງ​ ພະຍາດ ​ໂຄ​ວິດ-19 ​ໃນພື້ນ​ທີ່​ ວ່າ ມີ​ການ ​ຢືນຢັນ ມີຜູ້​ເສຍ​ຊີວິດ​ 606 ຄົນ, ຫລຸດ​ລົງ 20% ​​ເມື່ອ​ທຽບ​ໃສ່ ​ຕົວ​ເລກ ສະຖິຕິ​​ ເມື່ອ​ວັນ​ພຸດ ​ຜ່ານ​ມາ, ​ເປັນ​ຕົວ​ເລກ ຕ່ຳ​ສຸດ​ໃນ​ຮອບ 10 ມື້​ຜ່ານ​ມາ ​​ເຮັດ​ໃຫ້​ ຍອດ​​ຈຳນວນ ​ຜູ້​ເສຍ​ຊີວິດ​ ສະ​ສົມ​ ຢ່າ​ງໜ້ອຍ 16.606 ຄົນ. ​ໃນຂະນະ​ທີ່ ​ຜູ້​ຕິດ​ເຊື້ອ​ ສະ​ສົມ 226.198 ຄົນ ​ເພີ່ມ​ຂຶ້ນ 16.106 ຄົນ ກວມ​ເອົາ 3,49% ​ໂດ​ຍຄຳ​ສັ່ງ​ ​ໃຫ້ໃສ່​ ໜ້າ​ກາກ ​ອະນາ​ໄມ ຫລື ໜ້າ​ກາກ ​ຜ້າ​ແພ ​ເມື່ອ​ຢູ່​ນອກ ​ເຄຫາ​ສະຖານ ​ໃນ​ກໍລະນີ ບໍ່​ສາມາດ ​ຮັກສາ ​ໄລຍະ​ຫ່າງ​ ທາງ​ສັງຄົມ ​ໄດ້​ເກີນ 2 ​ແມັດ ຈະ​ມີ​ຜົນ​ບັງ​ຄັບ​ໃຊ້ ນັບ​ແຕ່​ ວັນ​ທີ 18 ​ເມສາ​ນີ້​ເປັນຕົ້ນ​ໄປ. ປັດຈຸບັນ ສ.ອາ​ເມ​ລິ​ກາ ມີ​ຜູ້​ເສຍ​ຊີວິດ ​ຈາກ​ໂຄ​ວິດ-19 ທັງ​ໝົດ 28.998 ຄົນ, ຜູ້​ຕິດ​ເຊື້ອ​ທັງ​ໝົດ 662.045 ຄົ​ນ ​ແລະ ​ໄດ້​ຮັບ ​ການປິ່ນປົວ​ດີ​ແລ້ວ 54.703 ຄົນ./.